पैरवी अनलाइन
प्युठान,नेकपा एमालेका उम्मेदवार सूर्य थापा यतिबेला गाउँ–गाउँ पुगेर मतदाता भेटघाटमा सक्रिय छन्। चुनावी प्रचारलाई केवल भाषण र सभा–सम्मेलनमा सीमित नराखी उनले घरदैलो कार्यक्रमलाई प्राथमिकतामा राखेका छन्।
घरदैलोका क्रममा उनी मतदातासँग बस्दै उनीहरूको दुःख–सुख सुन्छन्, समस्या बुझ्छन् र समाधानका प्रतिबद्धता व्यक्त गर्छन्। कतै वृद्ध बासँग परम्परागत डोको बुन्न सिक्दै,कतै सिकर्मी दाजुसँग घर निर्माणमा सघाउँदै,त कतै भान्सामा आगो बालेर मकै भुट्दै उनी गाउँले जीवनशैलीसँग आत्मीय रूपमा जोडिएको देखिन्छन्।
स्थानीयहरू भन्छन्,“नेता आएर हातेमालो गर्नु, श्रमलाई सम्मान गर्नु आफैँमा ठूलो कुरा हो।” यसले मतदातासँगको दूरी घटाउने र विश्वासको सम्बन्ध बलियो बनाउने काम गरेको उनीहरूको भनाइ छ।
ग्रामीण परिवेशमा श्रमलाई महत्व दिने संस्कृतिमा यस्तो व्यवहारले सकारात्मक सन्देश दिएको देखिन्छ। चुनावी प्रतिस्पर्धा चर्किँदै जाँदा उनको यस्तो शैलीले मतदातामाझ कत्तिको प्रभाव पार्छ, त्यो भने निर्वाचन परिणामले नै तय गर्नेछ।
ऐरावती–४ निवासी होम बहादुर पुनले घरमा डोका बुन्दै थिए।प्रचार टोली त्यहीँ पुग्यो।सामान्य अभिवादनपछि थापा पनि नजिकै बसे। “मलाई पनि सिकाइदिनु न,” भन्दै उनले हातमा चोया समाते। केही बेरमै डोरीको गाँठो मिलाउन सिक्दै गर्दा वरिपरि हाँसो र उत्साह फैलियो। गाउँलेहरूका लागि त्यो दृश्य नौलो थियो—नेता भाषणभन्दा श्रममा रमाउँदै थिए।
अर्को घरमा नयाँ घरको गारो लगाउने काम हुँदै थियो। औजार समातेर उनले केही समय सिकर्मी दाजुसँगै काममा सघाए। पसिना बग्दै गर्दा उनले भने, “गाउँको विकास भनेको यस्तै श्रमको मूल्य बुझ्नु हो।” स्थानीयहरूका अनुसार नेताले श्रमको सम्मान गरेको दृश्यले अपनत्व बढाएको छ।
कहीं भान्सामा आगो बालेर मकै भुट्ने, त कहीं आँगनमै बसेर चिया पकाउँदै गफिने—उनको घरदैलो अभियानमा औपचारिकता कम र आत्मीयता बढी देखिन्छ। मतदातासँगै बसेर समस्या सुन्ने, सुझाव टिपोट गर्ने र आफ्ना योजनाबारे खुला संवाद गर्ने उनको प्रयासलाई गाउँलेहरूले सकारात्मक रूपमा लिएका छन्।
चुनाव नजिकिँदै जाँदा प्रचारको शैलीले पनि मतदाताको मन जित्न महत्त्व राख्छ। श्रमसँगै जोडिएर संस्कृतिलाई सम्मान गर्दै मत माग्ने उनको यो शैलीले ग्रामीण मतदातामाझ प्रभाव पार्ने अपेक्षा गरिएको छ।
अन्ततः मतपेटिकाले नै निर्णय गर्नेछ—तर गाउँका आँगनमा देखिएको आत्मीयता र श्रमप्रतिको सम्मानले चुनावी माहोललाई भने अवश्य नै फरक बनाएको छ।
सम्बन्धित खवर
प्रतिक्रियाहरू (0)
प्रतिक्रिया राख्नुहोस्
प्रतिक्रिया राख्नुहोस्