राम बहादुर विश्वकर्मा
प्युठान,जन्मदिन प्रायः आफ्नै खुसी मनाउने दिनका रूपमा चिनिन्छ।नयाँ कपडा,केक,शुभकामना,साथीभाइको जमघट र उत्सव-जन्मदिनसँग जोडिने सामान्य दृश्य हुन्। तर प्यूठान नगरपालिका-७,पुण्यखोलाका युवा समाजसेवी विशेक थापाले आफ्नो जन्मदिनलाई भने फरक अर्थ दिएका छन्।
आफ्नो खुसीमा अरू दुई बालबालिकाको भविष्य जोड्ने निर्णय गर्दै थापाले आफ्नो जन्मदिनको अवसरमा दुई विद्यार्थीलाई कक्षा १० सम्म शैक्षिक सहयोग गर्ने घोषणा गरेका छन्।
उनले आफूले प्रारम्भिक शिक्षा हासिल गरेको श्री क्षेत्र विकास माध्यमिक विद्यालय,पुण्यखोलामा अध्ययनरत दुई विद्यार्थीको शिक्षामा आवश्यक सहयोग गर्ने प्रतिबद्धता जनाएका हुन्।
विद्यालयको कक्षा ५ मा अध्ययनरत प्यूठान नगरपालिका-४,सुनारटोल,बिजुवार निवासी रमिता सुनार र कक्षा ३ मा अध्ययनरत लिपिकोट निवासी आहान सुनार अब कक्षा १० सम्मको शैक्षिक यात्रामा थापाको सहयोग पाउनेछन्।
विद्यालयका अनुसार उनीहरूका लागि आवश्यक स्टेशनरी सामग्री,विद्यालय पोशाक,परीक्षा शुल्क,ट्युसन शुल्कलगायतका शैक्षिक खर्च थापाले व्यहोर्नेछन्।

‘मेरो जन्मदिन कसैको भविष्य निर्माणमा काम लागोस्’

 

थापाका लागि यो निर्णय अचानक आएको होइन।आफ्नो जन्मदिनलाई केवल व्यक्तिगत उत्सवमा सीमित नराखी समाजमा केही सकारात्मक योगदान गर्ने सोचले उनले यस्तो घोषणा गरेका हुन्।

उनको बुझाइमा जन्मदिनमा आफूले पाएको खुसी अरूसँग बाँड्नुको अर्थ केवल मिठाई वा उपहार बाँड्नु मात्र होइन।कसैलाई पढ्न सहयोग गर्नु,कसैको सपना पुरा गर्न सानो आधार बनिदिनु र आवश्यक परेको समयमा साथ दिनु पनि खुसी बाँड्ने एउटा अर्थपूर्ण माध्यम हो।
त्यसैले उनले आफ्नो जन्मदिनको अवसरलाई दुई विद्यार्थीको शिक्षासँग जोड्ने निर्णय गरे।
जहाँबाट सुरु भयो शैक्षिक यात्रा,त्यहीँ फर्किए
थापाको निर्णयमा अर्को भावनात्मक पक्ष पनि छ।
श्री क्षेत्र विकास माध्यमिक विद्यालय,पुण्यखोला उनको आफ्नै शैक्षिक यात्राको सुरुवात भएको विद्यालय हो।
कुनै समय उनी पनि यही विद्यालयमा विद्यार्थीका रूपमा बसेर भविष्यका सपना बुन्थे।त्यही विद्यालयमा पढेर हुर्किएका थापा अहिले आफुले सिकेको ठाउँमै फर्किएर अर्को पुस्ताका विद्यार्थीको शिक्षामा योगदान गर्न पुगेका छन्।
यो दृश्य आफैँमा एउटा सुन्दर सन्देश हो-विद्यालयले दिएको शिक्षा र संस्कार बोकेर हुर्किएको विद्यार्थी वर्षौँपछि त्यही विद्यालयमा फर्किएर अर्को पुस्ताको भविष्य निर्माणमा जोडिन सक्छ।
उनको सहयोगले विद्यालय र विद्यार्थीबीचको मात्र होइन,पूर्वविद्यार्थी र आफ्नो शिक्षण संस्थाबीचको सम्बन्ध पनि बलियो बनाउने अपेक्षा गरिएको छ।