कसरी सम्भव भयो अस्ट्रेलियामा कोरोना नियन्त्रण ? यस्ता छन् ४ उपाय

 

प्रतीक सिग्देल

२० जेठ, तास्मानिया । हाल अष्ट्रेलियामा कोरोना भाइरस (कोभिड-१९)का संक्रमित निको हुने दर उल्लेख्य मात्रामा बढेको छ भने नयाँ संक्रमित देखिने दर पनि घटेको छ ।सरकारी तथ्यांकका अनुसार अष्ट्रेलियामा हालसम्म ९२ प्रतिशत कोरोना संक्रमितहरु निको भइसकेका छन् भने बाँकी रहेका बिरामीहरुको स्थिति पनि सामान्य हुँदै गएको छ ।

अष्ट्रेलियामा कोरोना महामारीको सुरुआतदेखि यो समाचार तयार पार्दासम्म संक्रमितहरुको संख्या कूल सात हजार १९५ रहेको छ, जसमध्ये ६ हजार ६१६ जना निको भएर घर फर्किसकेका छन् । हालसम्म अष्ट्रेलियामा यो महामारीका कारण मृत्यु हुनेको संख्या १०३ छ ।

अष्ट्रेलियामा सबैभन्दा पहिला जनवरी २५ का दिन चीनको वुहानबाट भिक्टोरिया राज्यको मेलबर्न फर्केका एक व्यक्तिमा संक्रमण देखिएको थियो ।मार्चको अन्त्यसम्ममा संक्रमितहरुको संख्यामा गुणात्मक वृद्धि भए पनि त्यसपछिका दिनहरुमा निरन्तर कमी आउन थाल्यो ।समाचार तयार पार्दाको दिनसम्म अष्ट्रेलियाका आठ वटा राज्यहरुमध्ये ५ वटा राज्यहरुमा नयाँ संक्रमितहरुको संख्या शून्य रहेको छ भने अन्य राज्यहरुमा पनि संक्रमणको संख्या निकै घटेको छ । संक्रमण घटेसँगै राज्यहरुले लगाएका विभिन्न प्रतिबन्धहरु केही खुकुलो बनाउँदै लगेका छन् ।

कसरी नियन्त्रण भयो अष्ट्रेलियामा कारोना ?

अष्ट्रेलियामा कोरोना भाइरसको संक्रमण कम हुनुमा (हालसम्मको तथ्यांक हेर्दा) थुप्रै कारणहरु छन् । सरकारको तदारुकता, नागरिकहरुले पालना गरेको अनुशासन, सहकार्यलगायतका कुराहरुले पनि कोरोना संक्रमणमा कमी आएको अधिकारीहरु बताउँछन् । त्यति मात्र होइन, कोरोना संक्रमितहरुको नि:शुल्क उपचार, संक्रमितसँग नजिकको सम्पर्कमा आएकाहरुलाई सरकारी सुविधासहितको दुइहप्ते क्वारेन्टिनको व्यवस्थासमेत सरकारले व्यवस्था गरेको थियो । यिनै कारणहरुले पनि अष्ट्रेलियामा कोरोना नियन्त्रण गर्न सजिलो भएको सरकारी अधिकारीको मत छ ।

कोरोना नियन्त्रणमा छुट्टाछुट्टै राज्यले आफ्नो मौलिकता अनुसार फरक-फरक तरिका अपनाए पनि अष्ट्रेलियाभर कोरोना नियन्त्रण हुनुमा मुख्यतः यी चार विधिहरुले काम गरेको देखिन्छ ।

पहिलो : प्रधानमन्त्री स्कट मरिसनले भाइरसको संक्रमण फैलिन नदिन मार्च १९ बाट लागू हुने गरी अष्ट्रेलियाका नागरिक बाहेकका लागि अन्तर्राष्टिय सिमाना बन्द गरिदिए (जुन हालसम्म कायम छ) । सीमा बन्दका कारण अन्य देशमा भएका संक्रमितहरु अष्ट्रेलिया प्रवेश गर्न पाएनन् । यद्यपि अन्य देशहरुमा रहेका आफ्ना नागरिकहरुलाई भने चार्टर गरेर ल्याइएको थियो ।

विज्ञहरुका अनुसार सीमा बन्द गरिनु नै अष्ट्रेलियाको लागि कोरोना नियन्त्रणमा पहिलो तथा प्रभावकारी माध्यम थियो । सरकारले सीमाना बन्द गरेर यात्रामा कडा प्रतिबन्ध लगाउनु नै अष्ट्रेलियाको लागि फलदायी साबित भएको सिड्नी युनिभर्सिटीका प्रोफेसर आडम काम्राड स्कटले बताएका थिए ।

दोस्रो : कोरोना भाइरसबाट हुन सक्ने सामुदायिक संक्रमणलाई रोक्न अष्ट्रेलियाको सरकारले सार्वजनिक स्थलहरुमा मानिसहरुको जमघटमा सीमितता राख्न निर्देशन दियो । त्यस्तै अत्यावश्यक सेवामा पनि मानिसहरुको भिडभाड हुने ठाउँ जस्तै ‘डिपार्टमेन्टल स्टोर’हरुमा मानिसहरुबीच १.५ मिटरको दुरी कायम गराइयो ।

अत्यावश्यक सेवाहरु वाहेक अन्य सेवाहरुमा प्रतिबन्ध लगाइयो । होटल रेष्टुरेष्ट, पब, खेलकुद लगायत मनोरञ्जनका अन्य गतिविधिहरु सम्पूर्ण रुपमा बन्द भए । विभिन्न चरणअनुसार ल्याइएका यी प्रतिबन्धहरुका कारण पनि मानिसहरुबीचको सम्पर्क घट्यो र एकआपसमा संक्रमण फैलिनबाट रोकियो ।

तेस्रो : अष्ट्रेलियामा कोरोना भाइरसको संक्रमणमा वृद्धि देखिनासाथ यहाँको सरकारले नागरिकहरुमा परीक्षणको दायरा बढायो । स्वास्थ्यकर्मीहरुले एक दिनमा २० हजारदेखि २५ हजारजनासम्मको परीक्षण सम्पन्न गरेको तथ्य संचारमाध्यमहरुमा पढ्न र देख्न पाइन्छ ।

स्वास्थ्य विभागका अनुसार हालसम्म देशभरीमा १४ लाख ७२ हजार जनालाई कोरोना परीक्षण गरिसकिएको छ । सरकारले परीक्षणको दायरा बढाएपछि संक्रमण देखिएकाहरुलाई छु्ट्टा-छुट्टै क्वारेन्टिनमा राखेर विशेष निगरानीमा राखेको थियो ।

चौथो : १५ मेका दिन अस्टेलियन सरकारले कोरोना भाइरस ट्रेसिङ एपको प्रारम्भ गर्यो । यो मोबाइल एपको सहयोगले संक्रमितहरुसँग नजिकको सम्पर्कमा रहेका व्यक्तिहरुको पहिचान गरी उनीहरुलाई संक्रमण हुनबाट जोगाउन मद्दत गर्यो । यो एप डाउनलोड गर्ने व्यक्तिले आफू कोरोना भाइरसबाट कत्तिको सुरक्षित छु भन्ने कुरा पनि थाहा पाउँछ ।

संक्रमितको संख्या बढ्नुमा पानीजहाज जिम्मेवार

अष्ट्रेलियाको स्वास्थ्य विभागका अनुसार हालसम्म समुदायभित्र एक मानिसबाट अर्को मानिसमा कोरोना भाइरस सर्नेहरुको संख्या न्यून छ ।अष्ट्रेलियामा कोरोना भाइरसको संक्रमण बाहिरबाट आएकाहरुमा धेरै देखिएको छ । जसमा एक पानीजहाज रुबी प्रिन्सेस पर्दछ । स्थानीय सञ्चारमाध्यमका अनुसार अष्ट्रेलियाली पानीजहाज रुबी प्रिन्सेसका करिब २ हजार ७ सय यात्रुहरु मध्ये अधिकांशमा कोरोना भाइरसको लक्षण देखिँदा देखिँदै उनीहरुलाई विना परीक्षण न्यु साउथ वेल्स राज्यको सिड्नी हार्वरमा उतारिएको थियो । त्यसको केही दिनदेखि उक्त पानीजहाजका यात्रुहरुमा कोरोना संक्रमण देखिन सुरु गरेको थियो ।

सञ्चारमाध्यमहरुका अनुसार अस्टेलियामा देखिएका संक्रमितहरुको कूल संख्याको १० प्रतिशत उक्त पानीजहाजसँग सम्बन्धित छ । उक्त पानीजहाजका संक्रमित यात्रुहरुमध्ये हालसम्म २२ जनाको मृत्यु भइसकेको छ भने ८ सय जना संक्रमित छन् ।

न्यु साउथ वेल्स राज्यका स्वास्थ्यमन्त्री ब्राड हजार्डले उक्त पानीजहाजबाट यात्रुहरु उतार्नु नै गम्भीर गल्ती भएको स्वीकार गरिसकेका छन् । यात्रुहरुमा कोरोनासँग मिल्ने लक्षण देखिँदा देखिँदै किन उक्त पानीजहाज सिड्नीमा उतार्न अनुमति दिइयो भन्ने विषयमा न्यु साउथ वेल्स प्रहरीले जाँच सुरु गरिसकेको छ । प्रहरीले उक्त विषय मानवहत्यासँग सम्बन्धित भएको भन्दै आपराधिक अनुसन्धान गरिरहेको छ ।

प्रतिबन्ध खुकुलो, जोखिम उत्तिकै

पछिल्लो समयमा कोरोना भाइरस नियन्त्रणमा आएसँगै अस्टेलियाको विभिन्न राज्यहरुले आआफ्नै ढंगले विभिन्न चरणहरुमा गरेर लकडाउन खुकुलो पारेका छन् । न्यु साउथ वेल्समा फरक फरक परिरवारका पाँचजना मानिसहरुलाई भेटघाट गर्न छुट दिइएको छ भने भिक्टोरियामा २० जनाको संख्यामा बहिर निस्कन, घुम्न पाइन्छ । कोरोना भाइरसका कारण ठप्प भएको व्यवसायका कारण आर्थिक गतिविधी कम भएको र राष्ट्रिय अर्थतन्त्रमा पर्न सक्ने नकारात्मक प्रभावलाई मध्यनजर गर्दै लकडाउन खुकुलो पारिएको सम्बन्धित राज्यका प्रतिनिधिहरुले बताएका छन् । यद्यपि आफूलाई र अरुलाई संक्रमणबाट बचाउन सामाजिक दुरी कायम राख्नसमेत उनीहरुले आग्रह गरेका छन् ।

अस्टेलियामा कोरोना नियन्त्रणमा केही सफलता हासिल भयो भन्दैमा भाइरसको जोखिम नहुने तर्क गर्नु हतारो हुने अधिकारीहरु बताउँछन् । कोरोना नियन्त्रणसँगै खुकुलो पारिएको लकडाउनका कारण पनि संक्रमण फैलन सक्ने उच्च जोखिम रहेको तर्फ उनीहरु सचेत गराउँछन् । लकडाउन खुकुलो पारिएसँगै भविष्यमा हुनसक्ने संक्रमण फैलिनबाट बच्न सरोकारवालाहरुले मानिसहरुलाई भिडभाडबाट टाढा रहन, भेटघाटमा हुँदा सामाजिक दुरी कायम गर्न सुझाएका छन् ।